La Farga numerica es lo portal del Tractament automatic del lengatge (TAL, en anglés NLP) per l'occitan. Aquí, la comunautat que fa viure aquel domeni, e tanben los curioses, se pòdon téner informats dels darrièrs otisses que son estats desvolopats, de las API e de las ressorsas que pòdon èstre utilizadas per bastir de novèls desvolopaments, de las avançadas de las tecnicas, dels projèctes bèls en òbra...
La comunitat que s'ocupa de TAL occitan es escampilhada dins mantun parçan d'Occitània, e quitament per d'unes a l'internacional. La Farga numerica vòl far lo ligam entre totes aqueles actors que trabalhan, de còps, cadun dins son canton. Vòl èstre lor luòc d'encontre, d'escambis per favorizar l'emulacion e lo borbolh d'idèas. Mas a tanben l'objectiu de far conéisser melhor al grand public aquela comunitat qu'òbra sovent dins l'ombra, de metre en valor sos actors (que sián de personas o d'institucions) e de difusar lors realizacions.
L'objectiu de La Farga numerica es de far mai aisit lo trabalh dels que desvolopan d'otisses numerics en occitan, en recensant en un sol endreit las ressorsas a lor disposicion. I a tanben un espaci pels que vòlon participar mas que sabon pas tròp de qué far. Dins un domeni ont las donadas son centralas, lo crowdsourcing es un metòde sovent utilizat per las lengas ditas « pauc dotadas ». L'occitan es pas una excepcion e la comunautat dels locutors pòt ajudar fòrça a bastir los otisses de deman.
Enfin, los curioses d'informatic e d'occitan trobaràn de listas d'otisses e de tutorials per « occitanizar » un pauc mai lors ordenadors, tauletas e telefonets.
La Farga numerica es un portal bastit pel Congrès permanent de la lenga occitana.
