Trobaretz aquí d'informacions suls estandards utilizats per tractar las especificitat de l'occitan dins los domenis de l'informatica e del tractament automatic del lengatge. Es primordial per la lenga que la comunautat utilize los meteisses estandards o d'estandards interoperables. Aquò permet la reutilizacion del trabalh e doncas la mutualizacion dels esfòrces.
Se coneissetz d'estandards que son pas notats aquí, o se avètz de questions sus de donadas, de metadonadas... per las qualas i auriá besonh d'estandardizacion, podètz escambiar aquí-dessús sul Discord de La Farga.
Existisson d'etiquetas oficialas per d'unas varietats jos-varietats de l'occitan demest las etiquetas d'identificacion de lengas IETF registradas per l'IANA. Permeton de diferenciar las varietats de l'occitan en informatica.
Dins lo domeni del TAL, i a mantun estandard internacional per etiquetar las categorias gramaticalas dels mots (Eagles, Grace...). Mas la màger part prenon pas en compte las especificitats pròprias a l'occitan, coma los enonciatius gascons. Lo Congrès a doncas desvolopat un jòc d'etiquetas de categorias gramaticalas adaptat a la lenga occitana, interoperable amb los estandards internacionals e los otisses TAL liures de dreches mai utilizats.
Dins l'encastre de sos projèctes Lexics e Còrpus, Lo Congrès a definit de causidas de DTD especificas per l'utilizacion de la nòrma TEI-P5 pels lexics e còrpus al format XML. Prepausa una causida de balisas, d'atributs, de valors e d'imbricacions adaptadas a la lenga occitana.
