I a mantun biais d'ajudar al desvolopament de ressorsas e d'otisses pel tractament automatic del lengatge. Trobaratz çai-jós de biaisses de contribuir, que s'agisca de respondre a de besonhs permanents o de participar a de cridas a contribucions ponctualas.
Se avètz de competéncias especificas (en informatica per exemple) e que las volètz utilizar per far avançar las tecnologias de la lenga occitan, esitatz pas a nos contactar amb lo boton en bas de pagina. Vos metrem en relacion amb los actors d'aquel domeni als quals poiretz èsser mai util(a). Pels autres, esitatz pas a gaitar las activitats listadas çai-jos per troba la que vos conven melhor.
Se trabalhatz dins lo domeni de las tecnologias de la lenga en occitan e qu'avètz besonh de contributors, esitatz pas a nos o far saber en nos contactant mercés al boton en bas de pagina, difusarem l'informacion.
Se coneissètz de ressorsas o d'otisses que poirián ajudar los desvolopaires que trabalhan per las tecnologias de la lenga en occitan (còrpus formatats, lexics al format tablador o XML, API, otisses...) e que son pas recensats dins l'inventari, los nos podètz far conéisser per que los i ajustem.
D'estructuras que fargan de còrpus pel tractament automatic del lengatge, coma Lo Congrès o CLLE, an totjorn besonh de matèria occitana que pòsca enriquesir lors còrpus. Los contenguts pòdon èstre de tota mena, se son numerizats. Son primordials per bastir d'otisses coma la reconeissença vocala, la traduccion automatica, la deteccion de varietat...
Dos otisses collaboratius convidan lo monde a enregistrar de frasas en occitan per constituïr de còrpus audio alinhats. Aqueles serviràn a fargar d'otisses coma la reconeissença vocala. Se avètz enveja de vos enregistrar per ajudar a bastir aqueles otisses, o podètz far sus l'otís ReVoc (totas varietats) o sus Mozilla Common Voice (sonque occitan aranés pel moment).
I a ja un bon nombre de logicials qu'an una version en occitan. Mas aquelas traduccions devon èstre actualizadas per seguir las evolucions de las aplicacions. A mai, podètz començar una revirada per un logicial que n'a pas. En general, i a pas tròp besonh de competéncias en informatica per far de reviradas.
Podètz contribuir als diferents otisses de la fondacion Wikimedia, quitament se avètz pas un grand nivèl en informatic. Aquò crearà de contengut que serà fòrça preciós pels actors del tractament automatic del lengatge.
