Las personas qu'òbran per las tecnologias de la lenga en occitan an de perfils variats. Son de professionals, de benevòles, de còps los dos a l'encòp. I a de femnas e d'òmes, locutors o pas, e ne trobam dins mantun parçan del monde.
Aquesta seccion a per tòca de vos far conéisser d'unas personas-ressorsas d'aquela comunautat, amb lors domenis de coneissença màgers.
Las podètz retrobar sus la tela. N'i a qu'an de depausses a GitHub o GitLab. Mantuna a un perfil suls malhums socials màgers. Enfin, d'unas son inscriutas sul Discord de La Farga.
Alp Öktem es un lingüista computacional, especializat dins las tecnologias de la paraula (sintèsi vocala e reconeissença vocala), la traduccion automatica e la prosodia. Concentra son trabalh sus las lengas minoritàrias e marginalizadas. Obtenguèt un doctorat en 2019 a l'Universitat Pompeu Fabra de Barcelona.
Aure Séguier es responsabla del pòle TAL e desvolopaira al Congrès. Es tanben contributora als diferents portals de la fondacion Wikimedia.
Clamença Poujade es doctoranta a l'Universitat de Tolosa Joan Jaures dins lo laboratòri CLLE. Son trabalh pòrta sus l'anotacion automatica de còrpus escriuts monolingües d'occitan modèrne.
Danís Chapduelh es encargat de mission a l'IEO region Occitània e cap-redactor del Diari. A costat d'aquò, trabalha a son compte e fa, entre autra causas, de traduccion (tèxtes e logicials) e de lexicografia.
Eve Séguier es contributora als diferents portals de la fondacion Wikimedia : Wikimèdia Commons, Wikidata , Wikipèdia, Wikiccionari e Lingua Libre. Assegura la traduccion en occitan de Lingua Libre e desvolopa de modèles e de modules pel Wikiccionari. Participa tanben al projècte OpenStreetMap en occitan.
Florence Marcouyre es lexicografa al Congrès. Pendent son temps liure, es tanben granda contributora al Wikiccionari occitan e al Wiktionnaire francés.
Hèctor Alòs i Font es un tocassièr amb una formacion coma informatician, lingüista e istorian. Es fòrça investit dins lo desvolopament d'Apertium. A trabalhat coma sociolingüista en Chovashia (Federacion Russa), ont demòra dempuèi 2008.
