Quand d'unas lengas an de multinacionalas que trabalhan a far avançar lor tractament automatic, d'autras an pas de milierats de personas qu'òbran a lor informatizacion. L'occitan, coma un fum d'autras lengas pauc dotadas, deu una granda part de sas avançadas al contributiu, al collaboratiu e a l'open source. Lo traductor automatic Revirada es basat sul traductor liure Apertium, la sintèsi vocala Votz es en partida bastida su de modèles liures, las reconeissenças vocalas en bastison an fait una crida als « donaires de votz », lo gròs còrpus intègran de contengut de la Wikipèdia, la màger part de las traduccions de logicials son faitas benevòlament...
Es per aquò qu'avèm besonh de vosautres. Se volèm d'otisses de qualitat, cal de còrpus çò mai largs possible. Se volèm d'otisses capables de préner en compte la granda variacion intra e intervarietat de l'occitan, cal de ressorsas que rebaten aquela diversitat. Per çò far, lo contributiu es la sola solucion.
Se avètz enveja de participar a aquesta aventura collectiva qu'es l'avançada de las technologias de la lenga per l'occitan, sètz al bon endreit ! Trobaretz doas rubricas que vos explicaràn de quala faiçon podètz obrar al desvolopament d'otisses variats :
- Cossí contribuïr a las tecnologias de la lenga en occitan ? presenta los grands domenis de l'informatic dins los quals lo monde pòt contribuir per l'occitan. N'i a per totes, quales que sián lo nivèl d'informatica o de lenga. Trobaretz, tematica per tematica, d'informacions detalhadas que vos explicaràn cossí far.
- Cridas a contribucions se fa lo resson del monde qu'an besonh, en general de faiçon ponctuala, de contribucions sus un projècte especific. Vos permet d'ajudar en temps real als darrièrs otisses en desvolopament.
Se avètz un projècte dins lo domeni de l'informatic e de l'occitan e qu'avètz besonh de braces, podèm relaiar vòstra crida. Sufís de nos escriure en explicant vòstre projècte.
Per far mai aisits los escambis entre los que trabalhan amassa a far avançar l'informatica per l'occitan, avèm dobèrt un servidor Discord. I podètz descobrir la comunautat, presentar vòstres projèctes, demandar d'ajuda o de conselhs, balhar d'informacions sus de ressorsas o d'otisses... Per demandar a i entrar, es a l'adreça discord.gg/5phjPsD5XA.
