Minecraft es un jòc video de la mena aventura « bac a sable » qu'es fòrça presat pels adolescents. Es en partida revirat en occitan (lengadocian) mas o es pas qu'a mitat, doncas quand s'i jòga en occitan, i a una part dels messatges que son en anglés. Podètz ajudar a completar la revirada, qu'aver aquel jòc video tot en occitan seriá fòrça bon per la socializacion de la lenga.

Per poder revirar Minecraft, se cal primièr inscriure sus Crowdin, la plataforma qu'albèrga la traduccion del jòc video : https://accounts.crowdin.com/register. Oblidetz pas de validar vòstre corric.

Cal puèi anar sus la pagina de la traduccion de Minecraft en occitan : https://crowdin.com/project/minecraft/oc.

Ajustar un messatge revirat se fa en dos temps. Primièr, una persona prepausa una traduccion. Segond, d'autras personas validan la traduccion. Podètz doncas siá prepausar de traduccions novèlas, siá ne validar.

Se malgrat las explicacions çai-jos, capitatz pas de participar a la traduccion de Minecraft, podètz consultar la documentacion de Crowdin (en anglés) o mandar un corric a .

Prepausar una traduccion

Per prepausar una traduccion, clicatz suls tres punts a dreita de la linha del fichièr « Minecraft Translations » puèi clicatz sus « Translate ».

Arribatz sus una pagina amb totes los messatges a revirar. Podètz clicar dins la colona « Translation » en fàcia d'una cadena per la revirar de faiçon rapida.

Se avètz besonh de la traduccion en francés o en catalan, clicatz sul messatge anglés que volètz revirar, puèi sus « Other languages » a dreita de l'ecran. Las reviradas dins d'autras lengas apareisseràn.

Podètz regularament salvagardar vòstras reviradas amb lo boton « Save » al-dessús de las traduccions.

Votar per de traduccions existentas

A partir de la pagina de la traduccion en occitan de Minecraft, clicatz suls tres punts a dreita de la linha del fichièr « Minecraft Translations » puèi clicatz sus « Vote ».

Clicatz sul messatge que volètz votar per sa traduccion. A dreita de la fenèstra, la traduccion prepausada s'aficha dins la seccion « Occitan translations ». Passatz la mirga dessús, puèi clicatz sus « + » se pensatz que la traduccion es corrècta e sus « - » se pensatz qu'es pas corrècta.

Quand totes los messatges seràn estats revirats e que totas las reviradas seràn estadas validadas, lo jòc Minecraft serà disponible tot en occitan !