Linguatec AI es la seguida del primièr projècte Linguatec. Cofinançat pel Fons Europèu de Desvolopament Regional a travèrs de la crida Interreg POCTEFA (còdi EFA 104/01), a per objectiu de desvolopar las coneissenças en intelligéncia artificiala sus de modèls lingüistics generatius novèls aplicables a de lengas de las ressorsas escarsas e lor utilizacion per avançar dins la numerizacion de l’aragonés, del catalan, del basc e de l’occitan e dins la construccion d’una infrastructura lingüistica e intelligenta transfrontalièra que facilite la comunicacion entre los locutors de las diferentas lengas e l’accès multilingüe a l’informacion.
Linguatec es un projècte europèu transfrontalièr POCTEFA de desvolopament de las ressorsas e dels otisses numerics per las lengas dels Pirenèus. L'objectiu n'es, per la cooperacion transfrontalièra e lo transferiment de tecnologias, de desvolopar e difusar de ressorsas e aplicacions lingüisticas innovantas per l'occitan, l'aragonés e lo basco.
Apertium es una plataforma de traduccion liura que porgís un motor de traduccion automatica independent de la lenga, d'otisses lingüistics per gerir las donadas necessàrias als parelhs de lengas que i pòdon èstre ajustats e las donadas creadas.
Lo projècte Còrpus del Congrès a per tòca la constitucion d'un ensemble de còrpus pel desvolopament d'otisses de tractament automatic del lengatge. A un doble objectiu de quantitat (per poder entraïnar d'intelligéncias artificialas) e de representativitat de la diversitat de l'espaci lingüistic occitan.
Amb lo projècte COLaF (Còrpus e Otisses per las Lengas de França), Inria a per objectiu de contribuïr al desvolopament de còrpus e d'otisses liures pel francés e per las autras lengas de França, en collaboracion amb de partenaris academics e institucionals.
L'objectiu del projècte ParCoLaF, del laboratòri CLLE, es de far de ponts entre lo francés e las autras lengas de França en creant de còrpus parallèles per diferents parelhs de lengas, demest los quals lo parelh occitan-francés.
ReVoc es un projècte transfrontalièr triennal qu'a per mira de dotar l'occitan e l'aragonés d'una reconeissença vocala. Los tres sòcis màgers ne son Lo Congrès, per la partida occitana, la Rolde de Estudios Aragoneses per la partida aragonesa e la fondacion basca Elhuyar que s'encarga de la partida tecnica.
DiViTal a per tòca d'aumentar la vitalitat e la visibilitat de l'alsacian, del còrse, del peitavin-santongés e de l'occitan. Es a la crosada de la lingüistica descriptiva e de la lingüistica de còrpus. Sa tòca primièra es la constitucion de ressorsas, mai que mai de còrpus textuals bruts e annotats.
Lo projècte Araina, menat per la cooperativa Col·lectivaT, amb la collaboracion de l grop SoGeL de l'Universitat de Lhèida e sòcis del Conselh Consultatiu der Aranés, a per tòca la realizacion d'un grand còrpus audio transcriut per l'occitan aranés.
ROLF es un partenariat entre Lo Congrès, CLLE, Habiter le monde e LiLPa, qu'a per tòca de desvolopar de ressorsas de TAL per tres lengas de França : l'occitan, lo picard e l'alsacian. Aquel projècte desemboquèt sus la creacion de clavièrs predictius per las tres lengas.
