Los actors institucionals
Lo Congrès es l'organisme interregional de regulacion de la lenga occitana. Demest sos tres pòles de competéncias, n'i a un qu'es especializat dins lo tractament automatic del lengatge. A una mission de creacion d'otisses e de coordinacion dels actors dins lo domeni del TAL occitan.
Lo laboratòri CLLE (Cognicion, Lengas, Lengatges, Ergonomia) es una unitat de recèrca pluridisciplinària que, demest sos axes de recèrca, s'i tròba lo tractament automatic de la lenga, que se fa per d'unas lengas, dont l'occitan.
La Fondacion Elhuyar es una organizacion privada a but non lucratiu, que trabalhèt primièr a la difusion de la lenga basca e que uèi, en mai, ajuda de partenaris a recercar de solucions innovantas per respondre als desfises de la mondialisacion. Dins aquel encastre, ajuda l'occitan a se dotar dels otisses de TAL que n'a besonh.
Lo Grop de Recèrca en Sociolingüistica e Geolingüistica (SoGeL) es integrat dins TRAMA (Grop de Recèrca en Tranformacions dels Mejans Audiovisuals), del Departament de Filologia e Comunicacion (Facultat de Letras) de l'Universitat de Lhèida. SoGeL es dedicat a la recèrca sus la variacion geografica de la lenga e sas dinamicas socialas, mai que mai las que van ligadas a las frontièras politicas. Son trabalh es preferentament sul catalan e l'occitan.
Col·lectivaT es una cooperativa de trabalhadors a but non lucratiu basada de Barcelona, compausada de professionals eissits de l'immigracion, que s'especializa dins la recèrca sociala, los servicis lingüistics e las tecnologias de la lenga. Sa mission es de far de produits, d'otisses e de ressorsas de coneissenças lingüisticas, tecnologicas e sociala accessibles a las personas e a las comunautats marginalizadas.
Lo laboratòri BCL es jos la dobla tutèla del CNRS e de l'Université Côte d'Azur. Sos objèctes d'estudis son los lengatge, amb un apròchi integratiu e interdisciplinari que crotza lingüistica de la lenga, lingüistica del discors e psicologia cognitiva.
Inria (Institut nacional de recèrca en informatica e automatica) es l'institut de recèrca public dedicat a las sciéncias e a las tecnologias del numeric. Lo projècte COLaF, qu'amassa las equipas-projèctes ALMAnaCH e MULTISPEECH d'Inria, trabalha sus las tecnologias de tractament automatic de las lengas aplicadas al francés e a las lengas de França, amb l'objectiu de contribuïr al desvolopament de còrpus e d'otisses liures per aquelas lengas, dins un esperit de collaboracion amb de partenaris academics e institucionals.
La Fondacion Wikimedia es l'organisme qu'edita la Wikipèdia, Wikidata, lo Wikiccionari e mantun autre otís. Sa mission es « balhar al monde l'enveja e los mejans d'amassar e desvolopar de ressorsas educativas, amb una licéncia liura o dins lo domeni public, per las difusar dins lo monde tot ».
