Se pòt recercar dins lo Dicodòc del Congrès dirèctament a partir de la barra d'adreça de Google Chrome en metent en plaça un acorcit de motor de recèrca. Vos sufirà puèi de picar, per exemple « @ddoc parler » dins la barra d'adreça per recercar lo mot « parler » dins lo Dicodòc.

Primièr, vos cal generar l'adreça que servirà a l'acorcit. Per aquò far, anar sus la pagina de traduccions de Dicodòc. Causir los diccionaris dins los quals volètz recercar e picar, dins lo camp « Cercar ua entrada », lo mot « termederecercar ». Clicar sus « Cercar ».

Copiar puèi l'URL (l'adreça) qu'es dins la barra d'adreça. Normalament, deuriá semblar a quicòm coma « https://dicodoc.eu/oc/diccionaris?option=com_dicodoc&view=search&Itemid=168&type=fr-oc&dic%5B%5D=BASIC&dic%5B%5D=PNST&dic%5B%5D=LAUS&q=termedecercar&q2=&submit=Cercar ».

Clicatz suls tres punts de menut en naut a dreita puèi sus « Paramètres ».

Dins lo menut d'esquèrra, clicar sus « Motor de recèrca ». Puèi clicar sus « Gerir los motors de recèrca e la recèrca suls sites ».

Anar a la seccion « Recèrca sul site » e clicar sus « Ajustar ».

Dins la fenèstra que se dobrís, dintrar los paramètres del futur acorcit : « Dicodòc » pel camp « Motor de recèrca », e dins lo camp « Acorcit », lo còdi que volètz picar per accedir mai lèu al Dicodòc (dins nòstre exemple « @ddoc »).

Dins lo camp « URL amb %s en plaça de la requèsta », pegar l'adreça qu'avètz copiada, e remplaçar « termedecercar » per « %s ».

Clicar puèi sus « Ajustar ».

Es fach ! Podètz ara recercar dins lo Dicodòc en picant lo còdi d'acorcit qu'avètz causit e lo mot a recercar. Per exemple, se avètz causit l'acorcit « @ddoc », podètz picar « @ddoc parler » dins la barra d'adreça de Google Chrome per cercar lo mot « parler » dins lo Dicodòc.