Lo Congrès que hè ua crida a còrpus, mei que mei per las varietats aranesa, auvernhata, lemosina, provençau e vivaro-aupenca de l'occitan. Si avètz tèxtes, matèria audio (transcriuta o pas), vidèos en occitan e qu'ètz proprietari deus dreits, que'us i podetz har passar. Que servirà a entraïnar intelligéncias artificialas entà utís com la reconeishença vocau.

Lo Congrès qu'a bastit un utís de reconeishença vocau (qui passa la votz en escriut) entà l'occitan lengadocian e l'occitan gascon, e qu'a aviat las òbras entà l'occitan aranés. Qu'a tanben per projècte de bastir un utís qui reconeish automaticament la varietat d'un tèxte occitan. Aqueth utís que permeterà d'alargar los còrpus a partir de honts qu'an las varietats barrejadas, com la Wikipèdia. Que vòu tanben ensajar la traduccion automatica dab los hialats de neurònas.

Entà har tot aquò, que cau ua grana quantitat de dadas, tant textuaus coma audio. Mercés a finançaments euroregionaus, regionaus e departamentaus, ua quantitat bèra de mestior qu'estó amassada entà l'occitan gascon e lengadocian. Mes que manca dadas entà las autas varietats.

Entà aviar las òbras qui poderén alargar los utís ja desvolopats a l'occitan aranés, auvernhat, lemosin, provençau e vivaroaupenc, Lo Congrès que hè ua crida a còrpus. Si ètz proprietari deus drets de quau mestior que sia, que la podetz balhar. Per çò qui ei de las dadas textuau, que pòt estar contengut de sites web e blògs, tèxtes de libes (mei que mei au format doc, odt, docx o txt), compte-renduts, dorsièrs de premsa, actualitats o articles de premsa. Pertocant las dadas multimedia, que son interessantas las vidèos (sostitoladas o transcriutas quan ei possible), los collectatges transcriuts, las emissions de ràdio (dab la lor transcripcion si existeish), los libes audios...

De notar que tot aqueth contienut ne serà pas difusat. Que serveish a entraïnar d'intelligéncias artificiaus, mes ne hè pas partida de l'utís qui ei publicat au finau. Lo materiau qui estó dat que demora privat, arrés ne'u pòt pas recuperar entà tornà'u utilizar, l'autor originau ne risca pas nada concurréncia.

Si avetz aqueth tipe de contienut e que'u voletz dar au Congrès entà ajudà'u a desvolopar utís entà totas las varietats de l'occitan, que podètz escríver a o telefonar au 05 32 00 00 64.