Se coneissètz de ressorsas o d'otisses que poirián ajudar los desvolopaires que trabalhan per las tecnologias de la lenga en occitan (còrpus formatats, lexics al format tablador o XML, API, otisses...) e que son pas recensats dins l'inventari, los nos podètz far conéisser per que los i ajustem.
Per aquò far, podètz teledescargar lo fichièr modèle per l'inventari a l'adreça lafarganumerica.eu/images/documents/modele_inventari_farga.xlsx.
I trobaretz lo títol de las colonas per las qualas nos cal l'informacion, e una primièra linha amb un exemple d'otís (Revirada) per vos ajudar. Vos calrà indicar :
- Un títol per la ressorsa
- Los autors màgers o l'editor de la ressorsa
- Los dreits (© seguit del nom del proprietari dels dreits) o la licéncia de la ressorsa
- Lo format : vos cal clicar sus la sageta a dreita de la cellula e causir dins la lista desrotlanta
- La(s) lenga(s) pertocada(s) per la ressorsa, separadas per un punt-virgula. Se n'i a un fòrça grand nombre, indicar « occitan;autres ».
- La(s) varietat(s) de l'occitan pertocada(s) per la ressorsa, separadas per un punt-virgula. Se la coneissètz pas, daissatz vuèg.
- La categoria de la ressorsa : vos cal clicar sus la sageta a dreita de la cellula e causir dins la lista desrotlanta
- Qualques frasas que describon la ressorsa
- Lo ligam ont podèm trobar la ressorsa
Podètz, solide, recensar mantuna ressorsa sus mantuna linha del fichièr.
Se capitatz pas d'emplenar las colonas del fichièr, podètz tanben descriure la ressorsa dins un fichièr tèxte classic, sens doblidar d'indicar lo ligam, e ensajarem de completar las colonas nosautres meteisses.
Se sètz proprietari d'una ressorsa que volriatz partejar amb lo monde, mas que sabètz pas cossí la metre a disposicion en linha, la podèm albergar sus La Farga numerica. Dins aquel cas, vos cal mandar un corric ont explicatz quala es la ressorsa e vos indicarem cossí la podèm recuperar per la metre en linha en cò nòstre.
Dins totes los cases, mandatz lo fichièr XLSX completat (o la descripcion liura) per corric a .
