Lo Congrès es l'organisme interregional de regulacion de la lenga occitana. Demest sos tres pòles de competéncias, n'i a un qu'es especializat dins lo tractament automatic del lengatge. A una mission de creacion d'otisses e de coordinacion dels actors dins lo domeni del TAL occitan.
Desvolopèt de ressorsas de basa (projècte Lexics, projècte Còrpus) e mantun otís màgers coma lo traductor automatic Revirada, la sintèsi vocala Votz (dins l'encastre de Linguatec e Linguatec AI) o los clavièrs predictius e correctors ortografics Dicodòc. Mena actualament lo projècte ReVoc de reconneissença vocala per l'occitan.
Foguèt tanben a l'origina de la fuèlha de rota pel desvolopament numeric de l'occitan, qu'a per mira de coordonar las òbras dels diferents actors del TAL occitan mercés a un document-cadre que se pòsca integrar a las politicas lingüisticas de las collectivitats.
Enfin, es el que creèt La Farga, dins la mira de provesir un portal que centralize totas las informacions sul TAL en occitan.
