Linguatec AI es la seguida del primièr projècte Linguatec. Cofinançat pel Fons Europèu de Desvolopament Regional a travèrs de la crida Interreg POCTEFA (còdi EFA 104/01), a per objectiu de desvolopar las coneissenças en intelligéncia artificiala sus de modèls lingüistics generatius novèls aplicables a de lengas de las ressorsas escarsas e lor utilizacion per avançar dins la numerizacion de l’aragonés, del catalan, del basc e de l’occitan e dins la construccion d’una infrastructura lingüistica e intelligenta transfrontalièra que facilite la comunicacion entre los locutors de las diferentas lengas e l’accès multilingüe a l’informacion.

Lo consòrci d’aquel projècte transfrontalièr es dirigit per Elhuyar (a travèrs de son centre d'intelligéncia artificiala Orai) e compausat del Congrès, HITZ zentroa (UPV/EHU), l’Universitat Tolosa - Joan Jaurés (laboratòri CLLE), l’Universitat de Perpinhan, IKER-CNRS de Baiona, lo Govèrn d’Aragon e lo grop SoGeL de l’Universitat de Lhèida.

Dins aquel encastre, e amb l'ajuda de Col·lectivaT, es previst per l'occitan de melhorar lo traductor automatic Revirada e d'i ajustar la varietat aranesa, atal coma lo parelh de lenga occitan-catalan, de melhorar la sintèsi vocala Votz e d'i ajustar la varietat aranesa, e de crear un otís public de reconeissença vocala en occitan e una plataforma de sostitolatge occitan en linha. Se bastiràn tanben los lexics monolingües, bilingües e los còrpus audio e monolingüe necessaris pel desvolopament de totes aqueles otisses, atal coma un lexic occitan multigrafia e multivarietat.