Las personas qu'òbran per las tecnologias de la lenga en occitan an de perfils variats. Son de professionals, de benevòles, de còps los dos a l'encòp. I a de femnas e d'òmes, locutors o pas, e ne trobam dins mantun parçan del monde.
Aquesta seccion a per tòca de vos far conéisser d'unas personas-ressorsas d'aquela comunautat, amb lors domenis de coneissença màgers.
Las podètz retrobar sus la tela. N'i a qu'an de depausses a GitHub o GitLab. Mantuna a un perfil suls malhums socials màgers. Enfin, d'unas son inscriutas sul Discord de La Farga.
Joan Francés Blanc es webmèstre e titulari d'un DEA de Lingüistica e fonetica, opcion Tractament automatic de las lengas. Es un grand contributor de la Wikipèdia en occitan, de la quala es administrator e burocrata, e revira tanben de logicials en occitan.
Lucas Lévêque es contributor e formator als otisses de Wikimedia pel francés e, de quand en quand, per las lengas regionalas de França. Foguèt desvolopaire, bibliotecari e lexicografa e ara, acompanha las institucions culturalas als usatges dels otisses de Wikimedia.
Marianne Vergez-Couret es mèstra de conferéncia en lingüistica de còrpus e en lingüistica de còrpus a l'Universitat de Peitieus, ensenhaira al departament de sciéncias de lengatge e cercaira al FoReLLIS. A participat a la creacion de mantuna ressorsa e mantun otís pel TAL occitan.
Michael Barret trabalhèt coma lexicografe al Congrès, mai que mai per çò que pertòca los còrpus e las tecnologias de la paraula.
Myriam Bras es professora de linguistica al departament de Sciéncias del Lengatge de l’Universitat Tolosa Joan Jaurés e cercaira al laboratòri CLLE ont es co-responsabla de la còla « Lengas e Lengatges » e del grop de recèrca OCRE. Sos domènis de recèrca van de la semantica del temps a l'analisi del discors a l'interfàcia semantica-pragmatica, en francés e en occitan, en passent pel desvolopament de resorsas per la linguistica occitana.
Philippe Boula de Mareüil es director de recèrca pel CNRS al dintre del grop « Tractament del lengatge parlat » del laboratòri LIMSI. Abans aquò, foguèt enhenhaire de recèrca en lingüistica computacionala e tractament de la paraula a Elan TTS ont trabalhèt al desvolopament de sistèmas de sintèsi vocala.
Quentin Pagès es desvolopaire web de profession. Contribuís a de projèctes liures en prepausant l'integracion de l'occitan. Demest aqueles : lo navigator web Mozilla Firefox, las distribucions Linux Ubuntu e LinuxMint, lo malhum social Mastodon.
Vincent Gleizes a seguit d'estudis d'occitan e d'informatica. Es desvolopaire web fullstack, desvolopaire de logicial backend, d'arquitectura e de modelizacion logiciala, de CI/CD e s'interèssa a l'intelligéncia artificiala.
