Lo projècte Linguatec AI, projècte europèu transfrontalièr qu'es la seguida del primièr projècte Linguatec, s'es aviat al primièr semèstre de 2024. Sa tematica centrala es lo desvolopament de coneissenças en intelligéncia artificiala aplicablas a las lengas pauc dotadas, dels dos costats dels Pirenèus. Un consòrci d'estructuras occitanas, bascas, aragonesas e catalanas i trabalharàn amassa, partejant lors coneissenças e competéncias.

Al nivèl concret, Linguatec AI permetrà de desvolopar o melhorar d'otisses de tractament automatic del lengatge per las lengas pertocadas. Al nivèl de l'occitan, la tòca primièra es d'integrar l'occitan aranés als otisses ja desvolopats per l'occitan gascon e l'occitan lengadocian (traduccion automatica, sintèsi vocala, reconeissença vocala, multidiccionari en linha) e de fargar las ressorsas necessàrias al desvolopament d'aqueles otisses (còrpus textual monolingüe, còrpus bilingüe, còrpus audio alinhat, lexics monolingües, lexics bilingües).

Los otisses qu'existisson per l'occitan gascon e l'occitan lengadocian seràn tanben melhorats, e una interfàcia publica es prevista per far accessibla la reconeissença vocala, que pel moment a sonque la forma d'un motor que se pòt pas utilizar dirèctament.

Lo Congrès, CLLE, lo grop SoGeL de l'Universitat de Lhèida, Elhuyar e Col·lectivaT van trabalhar amassa pendent mantuna annada per fargar totes aqueles desvolopaments.